ព័ត៌មានបន្ថែម រឿងសង្ឃ និងតាអាចារ្យដែលបាត់ខ្លួន

ខេត្តសៀមរាប ៖ លោកអធិការក្រុងចេញមុខបកស្រាយការពិត និងកំពុងស្រាវជ្រាវជុំវិញករណីដែលត្រូវបានរិះគន់ពីមជ្ឈមដ្ឋាននានាថា ប្រជាការពារ និងកម្លាំងនគរបាលប៉ុស្តិ៍សង្កាត់ស្រង៉ែ និងកម្លាំងក្រុងសៀមរាប ធ្វើបាបទៅលើព្រះសង្ឃកម្ពុជាក្រោមមួយអង្គ និងអាចារ្យម្នាក់ ដែលបាត់ខ្លួននៅសង្កាត់ក្របីរៀលនោះ ពេលនេះនគរបាលក្រុងសៀមរាប បានចេញមកបកស្រាយពីដំណើររឿងដែលឈានរហូតដល់ការបាត់ខ្លួនព្រះសង្ឃ និងអាចារ្យនោះកាលពីយប់ថ្ងៃទី១៨ ខែមិថុនា ឆ្នាំ២០១៧ ពេលកន្លងទៅថ្មីៗនេះ។

លោកវរសេនីយ៍ឯក ទិត្យ ណារ៉ុង អធិការក្រុងសៀមរាប បានប្រាប់កោះសន្តិភាពនៅវេលាម៉ោង២និង៤៦នាទីថ្ងៃទី០២ កក្កដា នេះថា ករណីនេះជាការរៀបចំឡើងដោយក្រុមណាមួយ ដើម្បីធ្វើឱ្យមានការយល់ច្រឡំមកលើសមត្ថកិច្ចក្នុងបំណងមិនល្អ ហើយពេលនេះកម្លាំងនគរបាលកំពុងធ្វើការស្វែងរកអ្នកទាំងពីរ ដើម្បីរក្សាសុវត្ថិភាពជូនផងដែរ។ លោករៀបរាប់ពីដំណើររឿងថា កាលថ្ងៃទី១៨ មិថុនា វេលាម៉ោង២០និង៤៥នាទីយប់ បងប្អូនប្រជាការពារសង្កាត់ក្របីរៀល បានទទួលដំណឹងពីបងប្អូនប្រជាការពារសង្កាត់ស្រង៉ែ តាមរយៈវិទ្យុទាក់ទង (អាយកូម) ថា ឱ្យមកជួយមើលលោកសង្ឃមួយអង្គ និងតាចាស់ម្នាក់មិនដឹងនិមន្តទៅណាមកណាទេទាំងយប់ តាមផ្លូវគ្រួសក្រហមពីទិសខាងលិចឆ្ពោះទៅខាងកើត។ បន្ទាប់ពីបានទទួលដំណឹង សមាជិកប្រជាការពារសង្កាត់ស្រង៉ែ សមត្ថកិច្ចមូលដ្ឋានក៏តាមរកមើល ស្រាប់តែប្រទះឃើញព្រះសង្ឃ និងតាចាស់នៅចំណុចលើថ្នល់ដីក្រហម ស្ថិតក្នុងព្រំប្រទល់ភូមិតាចក និងភូមិចន្លោង ក្នុងសង្កាត់ស្រង៉ែ ដោយមានការសង្ស័យកម្លាំងក៏សួរនាំ តែនិយាយគ្នាស្តាប់មិនបាន ដូចមនុស្សវង្វេងស្មារតី ដោយសង្កេតឃើញថា ព្រះសង្ឃ និងតាចាស់មិនមានឯកសារ ឬព្រះឆ័យលក្ខជាប់ខ្លួនទេនោះ ខណៈកំពុងសួរនាំ ស្រាប់តែព្រះសង្ឃ និងតាចាស់នោះ ផ្តួលខ្លួនដេកឱបគ្នានៅលើថ្នល់ដីក្រហមធ្វើឱ្យមានការភ្ញាក់ផ្អើលដល់បងប្អូនប្រជាពលរដ្ឋដែលមានទីលំនៅក្បែរកន្លែងកើតហេតុ ហើយចេញមកឈររោមមើលជាច្រើននាក់ផងដែរ។

បន្ទាប់មកនៅវេលាម៉ោង៨និង០០នាទីយប់ កម្លាំងប្រជាការពារបាននាំព្រះសង្ឃ និងតាចាស់នោះមកប្រគល់ឱ្យនគរបាលប៉ុស្តិ៍នរដ្ឋបាលសង្កាត់ស្រង៉ែ ដើម្បីសាកសួរបន្ថែមដោយលោកអនុសេនីយ៍ទោ ធាវ ធឿត និងត្រួតពិនិត្យសម្ភារដែលនៅជាប់នឹងខ្លួនព្រះសង្ឃ និងតាអាចារ្យនោះ ឃើញមានត្រាមូលធំមួយ សម្ភារផ្សេងៗទៀតដូចជា ចែរកាច់ដុំថ្មតូចៗពណ៌ខ្មៅជាច្រើនដុំ និងលុយមួយចំនួននៅក្នុងថង់យាម តែសមត្ថកិច្ចយើងមិនបានធ្វើការដកហូតអ្វីឡើយ។

តាមការព្យាយាមសាកសួរព្រះសង្ឃ និងតាអាចារ្យបានប្រាប់ថា ចង់និមន្តទៅភ្នំគូលែន។ ក្រោយមកនៅវេលាម៉ោង០៨និង៥០នាទីយប់ លោកនាយប៉ុស្តិ៍ក៏បានណែនាំឱ្យប្រជាការពារយកម៉ូតូដឹកព្រះសង្ឃ និងតាចាស់នោះទៅបេនឡាន ប៉ុន្តែពេលឌុបមកដល់មុខក្លោងទ្វារចូលវត្តមេត្តាករុណា ព្រះសង្ឃ និងតាអាចារ្យនោះបានលោតចុះពីលើម៉ូតូ ហើយផ្តេកខ្លួនដេកឱបគ្នានៅនឹងដី ថែមទាំងទាញដោះស្បង់ចីវរ និងរបស់របរដែលជាប់នៅនឹងខ្លួនចោលអស់ បន្តិចក្រោយមកក៏ស្ទុះងើបរត់គេចខ្លួនបាត់ កម្លាំងប្រជាការពារព្យាយាមដើររកមើលដែរ តែរកពុំឃើញរហូតដល់វេលាម៉ោង១និង១៥នាទីយប់ឈានចូលថ្ងៃទី១៩ មិថុនា ប្រជាការពារបានសម្រេចឈប់ដើររកហើយ ត្រលប់ទៅគោលដៅរៀងៗខ្លួនវិញ។

លោក ទិត្យ ណារ៉ុង បន្ថែមថា លុះនៅវេលាម៉ោង០៧និង៣០នាទីព្រឹក ថ្ងៃទី១៩ មិថុនា កម្លាំងសមត្ថកិច្ចក៏ជួបប្រទះឃើញពួកគាត់ទាំងពីរនាក់នៅមុខវត្តកេសរារាម ស្ថិតនៅភូមិតាភុល សង្កាត់ស្វាយដង្គុំ ដោយលើខ្លួនមានស្លៀកការ៉ុង គ្មានអាវ បំរុងរត់ចូលឡានដែលកំពុងធ្វើដំណើរឆ្លងកាត់កំណាត់ផ្លូវជាតិលេខ៦ ពេលនោះសមត្ថកិច្ចយើងធ្វើការឃាត់នាំមកក្នុងបរិវេណវត្តកេសរារាម ដើម្បីសួរនាំ តែអ្នកទាំងពីរនិយាយស្តាប់គ្នាមិនយល់ ដោយឃើញអ្នកទាំងពីរស្លៀកការ៉ុង គ្មានអាវពាក់ សមត្ថកិច្ចយើងបានណែនាំ និងជួយរកខោឱ្យអ្នកទាំងពីរស្លៀក ពេលនោះមានកូនសិស្សនៅក្នុងវត្តបានឱ្យខោខ្លីពណ៌ខៀវ (ខោកីឡា) ០២ខោ ក្រោយស្លៀកខោរួចអ្នកទាំងពីរក៏ដេកឱបគ្នាយ៉ាងចំឡែកប្រហែល១៥នាទីក្រោយមកអ្នកទាំងពីរក៏ងើបស្ទុះរត់ចូលគន្លងផ្លូវជាតិលេខ៦ទៀត។ សមត្ថកិច្ចយើងបានពិភាក្សាគ្នាដឹកអ្នកទាំងពីរទៅដាក់នៅក្នុងបរិវេណវត្តទេពប្រណម ស្ថិតក្នុងបរិវេណប្រាសាទអង្គរធំ ដើម្បីសុវត្ថិភាព។ ប៉ុន្ដែក្រោយពីយកទៅដាក់នៅវត្តហើយ ព្រះសង្ឃ និងតាអាចារ្យនោះក៏បាត់ខ្លួនតែម្ដង ដោយមិនដឹងទៅដល់ទីណានោះទេ ទោះបីកម្លាំងតាមរកដល់ភ្នំគូលែនក៏រកមិនឃើញដែរ។ មកទល់ពេលនេះកម្លាំងនគរបាលកំពុងតែធ្វើការស្រាវជ្រាវបន្ដទៀត ដើម្បីចង់ដឹងថា តើនេះជារឿងអ្វីឱ្យពិតប្រាដក?

សូមបញ្ជាក់ផងដែរថា ប្រសិនបើមានបងប្អូនប្រជាពលរដ្ឋប្រទះឃើញព្រះសង្ឃ និងតាអាចារ្យ ដែលមានភិនភាគដូចរូបភាពខាងក្រោម សូមធ្វើការទំនាក់ទំនងផ្តល់ព័ត៌មានតាមរយៈទូរស័ព្ទលេខរបស់អធិការនគរបាលក្រុងសៀមរាប ៖ 012 630 641 / 012 239 240 ៕