កញ្ឆាជាង១២,០០០ដើម ត្រូវបានកម្លាំងនគរបាលខេត្តតាកែវ បង្ក្រាបបាននៅ៤៧ទីតាំងផ្សេងគ្នា ក្នុងស្រុកគិរីវង់

(តាកែវ)៖ កម្លាំងនគរបាលខេត្តតាកែវ ក្រោមការបញ្ជាផ្ទាល់ពីលោកឧត្តមសេនីយ៍ទោ អ៊ុក សំណាង ស្នងការនគរបាលខេត្ត បានបង្ក្រាបទីតាំងដាំបញ្ឆាជាង១២,០០០ដើម ក្នុង៤៧ទីតាំងផ្សេងគ្នា នៅថ្ងៃទី០៣ ខែកក្កដា ឆ្នាំ២០១៧ នៅអាងស្តុបទឹកប្រស់ចំនួន៥៤អាង ចំណុចដាបែកថ្លាង និងចំណុចដាក្រឡាញ់ ស្ថិតក្នុងភូមិជ្រោយ ឃុំព្រះបាទជាន់ជុំ ស្រុកគិរីវង់។

ថ្លែងប្រាប់ភ្នាក់ងារ Fresh News នៅរសៀលថ្ងៃទី៤ ខែកក្កដា ឆ្នាំ២០១៧នេះ លោកវរសេនីយ៍ទោ យុគ សារ៉ាត់ អធិការនគរបាលស្រុកគិរីវង់ ដែលបានដឹកនាំប្រតិបត្តិការនេះ បានឲ្យដឹងថា ​កម្លាំងនៃអធិការស្រុកសហការជាមួយប៉ុស្តិ៍ទាំង១២ បានចុះបង្រ្កាប និងដុតបំផ្លាញដំណាំកញ្ឆាខុសច្បាប់មានចំនួន៤៧ទីតាំង ស្មើនឹង​១២,៨១៣ដើម។

លោកអធិការបញ្ជាក់ថា ទីតាំងខាងលើនេះ កម្លាំងនគរបាលរបស់លោកបង្ក្រាបចំនួន៣លើករួចហើយ ប៉ុន្ដែម្ចាស់ទីតាំងមិនបញ្ឈប់សកម្មភាពនេះឡើយ។ បច្ចុប្បន្នកម្លាំងនគរបាលជំនាញ កំពុងធ្វើការស្រាវជ្រាវដើម្បីចាត់វិធានការបន្ដ៕