កម្លាំងនគរបាលអន្ដរប្រវេសន៍ ឃាត់ខ្លួនជនជាតិវៀតណាម២១នាក់ ដែលចូលមកធ្វើការ និងស្នាក់នៅដោយខុសច្បាប់ ក្នុងខណ្ឌជ្រោយចង្វា (Video)

(ភ្នំពេញ)៖​ នាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ដឹកនាំដោយលោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋាន ​សហការជាមួយកម្លាំង នៃស្នងការដ្ឋានគរបាលរាជធានីភ្នំពេញ ក្រោមការសម្របសម្រួលពីលោក សៀង សុខ ព្រះរាជអាជ្ញារង​ នៅព្រឹកថ្ងៃទី២៧ ខែមិថុនា ឆ្នាំ២០១៧នេះ ចុះឃាត់ខ្លួនជនជាតិវៀតណាម២១នាក់ នៅខណ្ឌជ្រោយចង្វា។

លោកឧត្តមសេនីយ៍ឯក អ៊ុក ហៃសីឡា​ បានអោយដឹងថា ប្រតិបត្តិការនេះធ្វើឡើងនៅ២ទីតាំងផ្សេងគ្នា ដោយទី១៖ ​ស្ថិតនៅការដ្ឋានបូមខ្សាច់ ក្នុងភូមិបាក់ខែង សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ បានឃាត់​ជនជាតិ​វៀតណាម សរុបចំនួន១៧នាក់ ក្នុងស្រី​០២នាក់។ ដោយឡែកទីតាំងទី២៖ ស្ថិតនៅម្តុំផ្សារព្រែកខ្វិត សង្កាត់ព្រែកលៀប ឃាត់ខ្លួនជនជាតិ​វៀតណាមចំនួន០៤នាក់ ក្នុងស្រី​០២នាក់។

បើតាមប្រធាននាយកដ្ឋានរូបនេះ ក្រោយឃាត់ខ្លួនជនជាតិវៀតណាមទាំង២១នាក់នេះ កម្លាំងជំនាញរកឃើញថាបាន​លួចឆ្លងដែនចូល​ស្នាក់នៅ និ​ងធ្វើការខុសច្បាប់ គ្មាន​សៀវភៅការងារ។ បច្ចុប្បន្នជនជាតិវៀតណាមទាំងនេះ ត្រូវបានបញ្ជូនទៅអគ្គនាយកដ្ឋានអន្ដោប្រវេសន៍ ដើម្បីកសាងសំណុំរឿងចាត់ការតាមនីតិវិធី៕